Bem-vindo iha página oficial Parlamento Nacional de Timor-Leste nian.

Parlamento Nacional nu’udar uma-fukun democracia nian. Deputado sira eleito diretamente hussi ita-nia povo, baseia ba ideias no projetos políticos ne’ebé sira-nia partidos defende no apresenta durante campanha eleitoral. Parlamento nia composição mak sei determina Governo atu forma oinsá, ho partido ida de’it ka ho coligação ida, conforme equilíbrio forças ne’ebé existe nu’udar resultado hussi cadeira Deputado nia percentagem hira mak consegue iha legislatura ida-idak. No povo ne’ebé vota hodi fó maioria ba partido ida, ka ba aliança partido sira-nian, bele mós la fó ona maioria ne’e iha eleição tuir mai, se sira la consegue hatán ba povo nia expectativas.

Informação ba cidadão sira essencial ba Parlamento democrático ida. Além de atividade partido político sira-nian rassik, no mós atividade hussi bancadas parlamentares hussi partido sira-ne’ebé eleito atu representa povo, Parlamento rassik nu’udar instituição, no nu’udar órgão de soberania, tem que informa ba público kona-ba serviço ne’ebé nia hala’o. Iha mundo agora daudaun ne’e Internet nu’udar fatin di’ak tebes atu halekar informação, no website ida-ne’e hanessan ferramenta importante hodi fó-hatene ba público kona-ba atividades no responsabilidades Parlamento Nacional nian.

Obrigado ba Ita-Boot nia visita no ha'u espera katak Ita-Boot sei gosta navega iha Parlamento nia website.

Aniceto Longuinhos Guterres Lopes

Presidente do Parlamento Nacional