Página Inicial » GMPTL » Notícia

Enkontru rede feto Parlamentares CPLP, 9-11 abril 2014, DILI, TIMOR-LESTE

 

Iha loron 9 fulan Abril tinan 2014, membru Rede Feto Parlamentares husi Komunidade País ho Lian Portuguȇs (CPLP) halaʼo sorumutu atu diskuti kona-ba tema sentrál “Direitu ba Paternidade no Pensaun ba alimentasaun – medidas aprovadas iha paízes membru CPLP.

 

Membru rede neʼebé presente iha enkontru neʼebá mak membru husi Angola, Moçambique, Portugal, São Tomé e Príncipe no Timor-Leste no mos membru GMPTL. Rede Feto Parlamentares nuʼudar organismu parlamentar ida neʼebé hareʼe ba kestoens igualdade jenéru no integra deputada sira neʼebé mak efektivu ninia funsaun iha Estadu Membru Parlamentu CPLP. Bai-bain Rede Feto Parlamentares halaʼo sira nia enkontru iha reuniaun sira Asembleia Parlamentar CPLP nian.

 

Reuniaun Rede Feto Parlamentares iha Timor-Leste mak presidi husi Deputada Cândida da Silva Celeste, husi Asembléia Nasionál Angola. Membru Rede Feto husi Portugál no Timor-Leste aprezenta medidas balun neʼebé adopta ona iha nasaun membru rua neʼe relasiona ho garante direitu labarik nian, liu-liu kona-ba prestasaun alimentasaun ba labarik sira sei inan-aman sira fahe malu. Membru Rede Feto Parlamentares husi kada país membru aprezenta mos kona-ba enkuadramentu legál iha ida-idak nia país neʼebé presiza atu halo revizaun hodi asegura no garante direitu labarik sira nian ba alimentasaun, edukasaun, saúde mental no fízika.

 

Durante diskusaun, Deputada sira membru Rede Feto foka liu ba realidade iha nasaun membru hanesan: inan solteiru sira, foin saé feto isin rua sedu no labarik barak mak tinan-tinan mate.

 

Hirak neʼe rezultadu husi fuga paternidade, abuzu seksuál, abonu infantil, servisu reforsadu ba labarik, abandona labarik, violénsia físika, no sst. Deputada sira mos foka ba ferias maternidade no paternidade, no direitu labarik sira nian ba prestasaun alimentasaun, edukasaun, no saúde mental no fízika. Kona-ba feriadu maternidade no paternidade, Portugál iha fulan 4 ne’ebé inan-aman fahe entre sira, no Timor-Leste iha fulan 3 feriadu maternidade no loron 5 ba feriadu paternidade. Enkuanto nasaun Afrikano sira, maske laiha poligamia deklarada maibé, susar ba sira atu aplika feriadu paternidade tamba iha aman barak neʼebé iha oan lubuk ida husi fen barak.

 

Ikus Deputada sira hare katak presiza duni elabora lei no kria mekanizmu no kondisaun sira neʼebé presiza atu garante direitu labarik sira nian no hadiak inan no labarik sira nia moris iha Estadu Membru.


Ligasaun Info Parlamentar Kontaktu

Rede Feto Timor-Leste

Rua : Formosa

UNFPA

Telefone: (+670) 3323884

UNWOMAN

Fax: (+670) 3323884

UNDP Timor-Leste

Blog Salurik

 

Blog Rede Feto