Parlamento Nacional Timor-Leste realiza Reunião Plenária dahuluk ba IV Legislatura no hili Presidente foun

Parlamento Nacional iha loron 05 fulan setembro tinan 2017, halo reunião Plenária dahuluk ba IV Legislatura nian. Reunião ne’e hahú iha horas 10:30, ne’ebé preside hussi Presidente em exercício, Adérito Hugo da Costa.


Iha discurso ne’ebé refere ba serviço ne’ebé halo iha III Legislatura nian, no desafio hirak ba IV Legislatura, Adérito Hugo da Costa mós entrega simbolicamente lembrança ida ba Secretária de Estado dos Assuntos Parlamentares, Maria Teresinha Viegas, nu’udar gesto ba relação di’ak entre Parlamento Nacional ho Governo.


Hafoin ida-ne’e, Deputado foun sira tuur iha fatin Plenária nian, Deputado sira hamutuk na’in 65 ne’ebé na’in 23 hussi partido FRETILIN, 22 hussi partido CNRT, 8 hussi partido PLP, 7 hussi partido PD no 5 hussi partido KHUNTO.


No tuir kedas constitui Comissão Eventual para Verificação de Poderes. Nune’e Comissão confirma legalidade ida-ne’e no Plenária vota ho unanimidade ba Relatório Comissão nian.


Ho processo hirak ne’e, continua ho realização juramento ba Deputado sira IV Legislatura nian. No anuncia lista candidato rua ba cargo Presidente Parlamento Nacional, tuir kedas discute nia processo regimental kona-ba votação ninian.


Candidato ba Presidente Parlamento Nacional, Deputado Aniceto Longuinhos Guterres Lopes hussi partido FRETILIN, no Deputado Adérito Hugo da Costa, hussi partido CNRT.


Votação ne’e realiza iha horas 21:30 no anuncio iha horas 22:15 kalan, hodi resulta Deputado Aniceto Longuinhos Guterres Lopes, hussi partido FRETILIN manán iha eleição ne’e ho votos 33, contra Deputado Adérito Hugo da Costa hussi partido CNRT ho votos 32.


Presidente Parlamento Nacional, eleito, Aniceto Longuinhos Guterres Lopes, iha nia discurso hatete nia sei sai Presidente ba Parlamento tomak, la haree partido no organização hodi continua mantem dialogo atu resolve diferencia sira ne’ebé acontece, no sei lori Parlamento Nacional ida-ne’e representa cidadão hotu.


Parlamento Nacional sei continua iha loron 06 fulan setembro tinan 2017 hodi hili membro da Mesa.



1 2