Pagina Inicial»Noticia
Iha loron 28 too 31 fulan outubro tinan 2018, delegação Parlamento Nacional participa iha reunião Asian Parliament Assembly (APA) Standing Commitee on Political Affairs and Special Commitee on Creation of Asian Parliament, ne’ebé hala’o iha Gwadar Paquistão.
Objetivo hussi reunião ne’e atu ko’alia kona-ba situação política atual no democracia iha Região Asia nian.
Durante reunião, delegação Timor-Leste hato’o posição Timor-Leste nian kona-ba direito povo Palestina nian no processo Democracia ne’ebé lao daudauk iha Região Asia.
Iha oportunidade ne’e delegação Parlamento Nacional mós halo sorumutu ho delegação DPR-RI, ne’ebe delegação Timor-Leste hussu ba DPR-RI atu apoio adesão Timor-Leste iha ASEAN, no hussu DPR-RI atu apoio Parlamento Timor Leste sai Full Member iha APA, tanba durante ne’e Parlamento Timor Leste sei hanessan membro observador.
Parte DPR-RI mós hussu apoio Timor-Leste nian iha Conselho Segurança ONU nian tanba horas ne’e daudaun Indonésia sei hanessan membro Não Permanente Conselho Segurança ONU nian.
Alem de ne’e delegação Parlamento Nacional mós halo reunião ho Chairman Senado Paquistão no Presidente Interino República Islâmica do Paquistão nian, Muhammad Sadiq Sanjrani no Leader House of Representive Paquistão, Syed Shibli Faraz, hodi hato’o agradecimento ba povo no Governo Paquistão tanba iha tinan 1999 Policia no Militar Paquistão mós envolve iha Missão da Paz iha Timor-Leste.
Delegação Parlamento Nacional Timor Leste composto hussi Deputada Maria Terezinha da Silva Viegas, Deputado Mariano Assanami Sabino Lopes, acompanha hussi assessor Júlio Tomas Pinto.
