Pagina Inicial»Noticia
Parlamento Nacional halo Decreto-lei n.º 3/2018 no Decreto-lei n.º 4/2018, hussi 14 de março, la vigora ona
Parlamento Nacional, liuhossi Reunião Plenária ordinária durante loron rua, hahú iha loron 6 to’o 7 fulan agosto tinan 2018, halo ona aprovação ba Projeto de Resolução n.º 9/V/1a, ho votos 36 a favor, 0 contra no 1 abstenção, hodi halo la vigora ona Decreto-lei n.º 3/2018, de 14 de março – Primeira Alteração ao Decreto-lei n.º 3/2015, de 14 de janeiro – Aprova o Currículo Nacional de Base de Educação Pré-escolar, no mós Projeto de Resolução n.º 10 /V/1ª, ho votos 36 a favor, 0 contra no 1 abstenção, hodi halo la vigora ona Decreto-lei n.º 4/2018, de 14 de março – Primeira Alteração ao Decreto-lei n.º 4/2015, de 14 de janeiro – Aprova o Currículo Nacional de Base do Primeiro e Segundo Ciclos de Ensino Básico.
Durante debate loron rua ne’e bancadas hussi partido sira-ne’ebé apoia Governo no mós Ministra da Educação defende posição katak importante atu halo vigora filafali currículos 2015 nian tanba sira considera katak iha benefício pedagógico hodi usa tetun nu’udar lian hodi hanorin iha educação pré-escolar no iha tinan sira dahuluk iha ensino básico, no introduz português neineik-neineik iha ensino básico ho sistema progressão linguística; sira mós considera katak VII Governo Constitucional nia decisão atu altera currículo sira-ne’e cedo demais tanba seidauk iha tempo atu avalia resultado hussi implementação currículos 2015 nian. Bancadas hussi partido sira oposição nian, hussi sorin seluk, defende katak currículos 2018 nian hamossu vantagem barak liu tanba hahú hanorin ho lian oficial rua, tetun no português, dala ida, iha educação pré-escolar kedas, no considera katak la adequado ba Parlamento Nacional atu discute possibilidade atu halo la vigora tan decretos-leis ne’ebé aprova tiha ona iha legislatura anterior no mós iha momento ne’ebé VII Governo labele ona mai iha Plenário atu defende ninia posição tanba troca tiha ona no agora VIII Governo Constitucional mak iha. Ho razão hirak ne’e, antes hakat ba votação ba projeto de resolução rua, bancada oposição FRETILIN ho PD decide la participa iha votação no sai hussi sessão plenária.
Reunião Plenária ne’e preside hussi Presidente do Parlamento Nacional, Arão Noé de Jesus, acompanha hussi membro da Mesa sira, no hetan presença hussi Ministro da Reforma Legislativa e Assuntos Parlamentares, Fidélis Magalhães, Ministra da Educação, Juventude e Desporto, Dulce de Jesus Soares, ho nia equipa sira.
