Desde julho 2013, Parlamento Nacional iha ona equipa ho Redator Transcritor na’in-15, ne’ebé sira-nia knaar principal mak transcreve debates Plenário nian no compila documento público relevante sira atividade parlamentar nian. Sira-nia serbisu garante memória histórica Parlamento nian, fó biban ba cidadãos sira agora daudaun, no husi geração sira aban-bainrua nian, atu hetan acesso ba saida maka ema dehan iha debate parlamentar sira. Iha debate sira-ne’e órgão de soberania Parlamento ne’e hala'o ninia papel legislador no mós ninia papel hodi fiscaliza atividade Governo nian no legislação ne’ebé Governo produz. Tanba muda discurso oral ba discurso escrito (ko’alia transfere fali ba hakerek) nu’udar processo ne’ebé han tempo barak, ne’ebé exige cuidado no atenção maka’as no hatene didi’ak técnica redação iha dalen tetun no português, redator sira organiza malu ba sira-nia knaar tuir prática di'ak ne’ebé testa tiha ona iha parlamento seluseluk. Transcritor na’in-ualu troca malu iha sala Plenário nian minuto 15 dala ida, hodi hakerek notas ne’ebé sei fó biban ba sira atu identifica deputados intervenientes bainhira sira transcreve gravação, no revisor ida sempre acompanha sira, no revisor na’in-rua ne’e troca malu horas ida dala ida. Fila fali tiha ba sala Redação e Transcrição nian, revisor na’in-rua sei verifica transcrições husi debates, no sei prepara esboço dahuluk súmula nian, no depois buat hotu-hotu sei haruka ba revisor final, ne’ebé tau matan ba texto nia qualidade.
Redator na’in-haat tan corrige no prepara compilações ho documento sira ba II série Jornal do Parlamento Nacional nian.
Molok Parlamento contrata sira, redator hotu-hotu tuir curso formação durante tinan ida, ho orientação husi assessora internacional Leonor Ferreira. Agora ne’e daudaun sira continua sira-nia formação liuhosi aulas lian português no mós sira hetan acompanhamento husi professor dalen tetun nian iha sira-nia serbisu.
