Komisaun Espesializada Permanente sira iha Parlamentu Nasionál, iha loron 25 fulan outubru tinan 2024, realiza audiénsia ikus ho Ministériu no Instituisaun relevante sira kona-ba apresiasaun inicial ba Proposta Orsamentu Jeral Estadu (OJE) 2025 no mos exekusaun Orsamentu Jeral Estadu 2024 nian.
Audiénsia ba loron ikus ne’e, iha parte dadeer, mak hanesan; Komisaun A ne’ebé trata asuntu Konstitusionál no Justisa, halo audiénsia ho Komisaun Funsaun Públika; Komisaun B ne’ebé trata asuntu Negósius Estranjeirus, Defeza e Seguransa Nasionál, ho Servisu Nasionál Intelijénsia; Komisaun C ne’ebé trata assuntu Finansas Públikas ho Komisaun D ne’ebé trata asuntu Ekonomia no Dezenvolvimentu, halo audiénsia ho Ministra Finansas, Autoridade Tributária, Autoridade Aduaneira no Banku Sentral Timor-Leste; Komisaun E ne’ebé trata asuntu Infraestrutura, ho Ministériu Dezenvolvimentu Rural no Habitasaun Komunitária; Komisaun F, ne’ebé trata asuntu Saúde, Seguransa Sosial no Igualdade Jéneru, ho East Timor Training no Rede ba Saúde (Rebas).
Iha parte lokraik, Komisaun A, kontinua audiénsia ho Komisaun Nasionál Eleisaun; Komisaun B, ho Ministériu Negosiu Estranjeiru e Kooperasaun no Vice-Ministru Negosiu Estranjeiru e Kooperasaun no Komisaun D ho Banku Nasionál Komersiu Timor-Leste (BNCTL).
Depois audiénsia sira ne’e, Komisaun Espesializada Permanente idak-idak sei elabora sira nia relatóriu no Pareser setorial, hafoin submete ba Komisaun C, ne’ebé trata asuntu Finansas Públicas hodi elabora relatóriu final ne’ebé sei aprezenta iha Plenária. Tuir kaléndáriu ba apresiasaun Orsamentu Jeral Estadu 2025 nian, sei hahu halo diskusaun iha jeneralidade iha loron 6 fulan novembru tinan 2024. FIM
