Prezidente Parlamentu Nasionál (PPN), Maria Fernanda Lay, akompaña husi nia vise-Prezidente, Alexandrino Afonso Nunes, Vise-Sekretaria Meza, Bendita Moniz Magno, Deputada Marquita Soare no equipa teknika sira kontinua partisipa iha eventu programa Dialogu ho Timor-Leste, iha ambitu Reuniaun Assembleia Jeral AIPA (ASEAN Inter-Parlamentar Assembly) ba dala 45, iha loron 20 fulan outubru tinan 2024, iha sala reuniaun Sentru Konvensaun Nasional, Laos , Vientiane.
Dialogu ida ne’e lidera husi Vise-Prezidente Assembelia Nasional LAO, Hon.PH.d. Sounthone Xayachack ho objetivu atu membru efetivu Parlamentu ASEAN nian hamutuk hodi hato’o sira nia afirmasaun ba apoiu Timor-Leste nia Adesaun mai iha membru efetivu ASEAN nian iha Timor-Leste inklui hametin Koperasaun Bilateral iha nivel Parlamentar nian ho Timor-Leste ba identifikasaun dezafiu no dezenvolvimentu iha aspetu oin-oin hanesan ekonomia, politika no sosial-kultura nian.
Iha dialogue ne’e, Prezidente Parlamentu Nasional, lori Parlamentu Nasional nia naran, fo agradesimentu ba Asembleia husi rejiaun ASEAN nian ne’ebe sempre sura ho Timor-Leste nudar Observador iha eventu importante ida ne’e , liu-liu ba Assembleia Nasional LAO nian ne’ebe bem perparadu hodi simu bañaka hotu-hotu, tanto husi membru efetivu ASEAN nian no nasaun observador sira inklui Timor-Leste.
Prezidente mos, hatutan tan katak, Timor-Leste iha hanoin boot atu sai membru efetivu iha ASEAN .Nune’e iha ona servisu makas hosi orgaun Estadu Timor-Leste nian atu bele kompleta rekejitu sira ne’ebe relevante ba priense kriteria iha futuru.
Timor-Leste tau as importansia kooperasaun servisu iha AIPA ba dezenvolvimentu Timor-Leste iha aspetu hotu-hotu iha futuru mai. Masque hasoru dezafiu oin-oin maibe dezafiu ne’e nudar dalan atu loke oportunidade diak hodi buka solusaun liu husi servisu hamutuk ho membru ASEAN nian ba dezenvolvimentu ida diak liu tan tuir mai iha nivel oin-oin no fo benefisia posetivu entre nasaun hotu ho Timor-Leste.
Iha okazaun importante ida ne’e , Chefe Delegasaun Timor-Leste ne'e konversa ho chefe delegasaun husi nasaun oin-oin nudar jestu amijade Timor-Leste ho sira inklui promove mos Timor-Leste Leste nia produtu lokal kafé no turismo ba mundu.
