Prezidente Parlamentu Nasionál, Maria Fernanda Lay, akompaña husi Vise-Prezidente, Alexadrino Cardoso, Vise-Sekretaria Meza, Bendita Moniz Magno, Deputada Marquita Soares no tekniku sira, partisipa reuniaun nivel altu AIPA (Asean Inter-Parlamentarian Assembly) ba dala 45°, iha loron 17 fulan outubru tinan 2024, Sentru Konvensaun Nasionál, LAOS Vientiane PDR.
Iha reuniaun dahuluk ne'e Prezidente Nasionál sai nudar Painelista hodi aprezenta materia kona-ba Estrategia Empodera Feto nia Partisipasaun iha vida Politika no Lideransa ho sub-tema: "Transformasaun Dezafiu no Oportunidade ne´ebe Inkuziva ba ema hotu iha Futuru", iha forum lider feto politika.
Iha aprezentasaun ne'e, Prezidente Parlamentu Nasional hato’o ho honra boot ba partisipasaun Feto Timor-Leste iha vida politika no lideransa nian, durante ukun’an to’o ohin loron Feto Timor-Leste hetan mudansa persentajen signifikante nebe a’as liu iha ASEAN pasifiku, kada periodu elisaun nasional sempre iha mudansa ba numeru Feto iha vida politika ho persentajen 38% no periodu antes liu to'o persentagen 40%, atinjimentu ne'e laos fasil, maibe liu husi esforsu feto hotu iha Timor-leste hodi servisu hamutuk no halo advokasia barak liu hosi ida-idak nia knar, oinsa hetan apoiu husi mane sira nune'e bele hamutuk dezemvolve Estadu Timor-Leste bazeia ba valor luta feto nian.
Asaun ne'e hatudu katak feto nia partisipasaun ba kontribuisaun iha dezenvolvimentu estadu ne'e importante tebes, masque nune'e esforsu ne'e seidauk to'o iha ne’e deit, maibe iha futuru kontinua halo esforsu makas liu tan hodi envolve feto sira nia partisipasaun iha vida politika laos tamba numeru deit maibe qualidade mos sai asuntu krusial hodi feto sira loron ba loron atu dezenvolve an diak liu tan.
Nune'e ba asuntu importante ida ne'e, lori Timor-Leste nia naran atu enkoraja feto maluk konta ho apoio mane sira nian, kontinua servisu hamutuk hodi hametin no hasa'e Feto nia partisipasaun Iha vida politika no lideransa ne'ebe inkluzivu ba ema hotu, liu husi kooperasaun grupo amizade Inter-parlamentar sira ne’ebe mak establese ona. "Wainhira ita loke odamatan Parlamentu nian konvida ona sebedoria feto hotu nian iha laran no mai ita fo tempo, semana ida atu rona, tinan ida implementa ba jerasaun ida hodi halo transformasaun" Prezidente mos hatutan tan katak masque numeru Feto Iha vida politika iha Timor-Leste hetan pozisaun as iha ASEAN Pasifiku, maibe sei iha desafiu barak, ita presisa servisu makas liu tan tuir estratejia hanesan, harí joven feto parlamentar iha eskola, kontinua loke espasu ba feto sira hodi halo kontaktu direta ba komponente nivel altu no relevante sira hodi buka solusaun ba feto nia problema, debate Anualmente kona-ba asuntu feto nian, sistema akompañamentu ba programa partisipasaun feto iha vida politika, halo empoderamentu abilidade ba feto no joven feto sira no envolve feto Universitaria sira ne’ebe iha talentu area politika nian.
Alein’de hetan partisipasaun maximu husi membru efetivu AIPA nian, iha mos reprezentante nasaun seluk husi kontinente Eropa hanesan, Ukraina, Norwegia, Russia, Moroco no Afrika sai hanesan observador. FIM
