Parlamentu Nasionál liu husi Grupo Nasionál Uniaun Inter-Parlamentar (UIP), lidera husi Prezidente Grupu, Deputado Saul Salvador Amaral, akompaña husi Vice-Prezidente, Deputada Maria Teresa Gusmão, Sekretária, Deputada Carminda Carlota, Membru Deputada Ana Bela Sávio, no tekniku sira, partisipa iha reuniaun Uniaun Inter Parlamentar ba dala 149, ho tema “Ciência, Tecnologia & Inovação: Caminho para a Transformação e Desenvolvimento Sustentável”, iha loron 13 too 17 fulan outubro tinan 2024, iha Genebra-Suíça.
Tuir agenda ne'ebe mak iha, reuniaun dahuluk, delegasaun sira sei partisipa iha reuniaun Forum Feto Parlamentar, Forum Jovens Parlamentar, Komisaun Paz no Seguransa internasionál, Komisaun Diretus Humanus, Komisaun Dezemvolvimentu Sustentavel no reuniaun Assembleia Jeral.
Além de ne’e, iha mos reuniaun seluk ba promosaun kooperasaun nian mak hanesan, reuniaun Asia-Pacific Group (APG), Asian Parlamentary Assembly (APA), no Grupo Assembleia Parlamentar ba Komunidade Países Língua Portuguesa (AP-CPLP). Delegasaun mos hetan konvite husi Embaixadora Timor-Leste nian iha Genebra hodi partisipa iha Seminariu g7+ nian.
Forum Feto Parlamentar koalia liu kona-ba reparasaun vitima husi konflitus armadus entre grupu ou nasaun, nomeadamente ba kazu sira mak hanesan, violensia seksual no assasinatu hasoru feto sira. Labarik sira mos sai vitima no lakon oportunidade ba assesu edukasaun, Saude no Infraestruturas bazikas; koalia kona-ba dezemvolvimentu sustentabel, konfliktu armadu fo impaktu negativu ba sosiedade sira, significa katak, sira labele assesu ba edukasaun, saude no infraestruturas bazikas; relativamente ho Diretos humanus, koalia liu kona-ba kompania sira ne'ebe mak ba investe iha nasaun barak maibe sira la kontribui ba dezenvolvimentu liu husi selu taxa ba estadu, ne'ebé prejudika reseitas Estadu nian no hatudu faktus katak Estadu labele investe ba setor ne'ebe mak fundamental tuir planu estadu nian.
iha reuniaun Uniaun Inter Parlamentar (UIP) ne'e, iha mos reuniaun ba Asosiasaun Sekretáriu-Jeral Parlamentu sira nian, no Sekretariu-Jeral Parlamentu Nasionál Timor-Leste, Edgar Sequeira Martins, mos partisipa iha reuniaun refere tuir agenda ne'ebe mak iha. FIM
