Parlamentu Nasionál liu husi Komisaun C, ne’ebé trata asuntu Finansas Públikas, organiza semináriu Panorama Orsamental ba tinan Fiskal 2025 nian, durante loron rua, 16 no 17 fulan outubro tinan 2024, iha Alma do Mar Resort-Munisipiu Liquiçá.
Semináriu ne’e rasik hetan abertura ofisial husi Prezidente Parlamentu Nasionál em exersisiu, Deputada Maria Terezinha da Silva Viegas, antes halo abertura oficial ne’e, iha mos diskursu husi Prezidente Komisaun C, Deputada Cedelizia Faria dos Santos, husi Reprezentante husi PNUD, Katyna Arqueta, representante husi Uniaun Europeia, no Reprezentante husi Governu.
Iha diskursu abertura Prezidente Komisaun C, Deputada Cedelizia Faria dos Santos nian hatete, semináriu ne’e ho objetivu sira mak hanesan: promove transparénsia liu husi dialogu, no fahe informasaun ba malu em relasaun ho makroeconomia, analisa ba planu asaun anual em relasaun ho programa IX Governu Konstitusional nian, nune’e mos Planu Dezenvolvimentu Nasionál no Objetivu Dezenvolvimentu Sustentável, impaktu husi fatores mundial ba iha dezenvolvimentu Timor-Leste nian, informasaun kona-ba planu investimentu iha rai laran, informasaun kona-ba rekursus naturais ne’ebé Timor iha, analise husi parte legal sira nian liu husi Tribunal Rekursu, no mos pontu de vista husi NGO lao hamutuk. Informasaun sira ne’e sei ajuda parte hotu atu komprende didiak no hatene saída mak sei halo iha tinan oin mai, liu-liu ajuda Deputadu sira wainhira iha audiénsia no Plenáriu durante debate ba OGE 2025, nune mos, wainhira osamentu ne’e aprova bele sai hanesan matéria base ba Deputadu sira dezempeña papel fiscalizador ba atividade Governu nian.
Orador sira ba semináriu Panorama Orsamental durante loron rua nian ne’e maka, Membru Governu, Tribunal Rekursu, Banku Central, PNUD no ONG Lao Hamutuk.FIM
