Parlamentu Nasionál liu husi reuniaun plenária ordinária, iha loron 7 fulan outubru tinan 2024, halo aprovasaun ba Proposta Lei n.º 11/VI (1ª) - Autorizasaun lejislativa ba matéria fixasaun limite idade ba servisu funsionáriu públiku no ajente administrativu sira nian.
Iha lejislasaun atuál laiha limite legál ba funsionáriu públiku no ajente administrativu sira atu hetan obrigasaun atu reforma, maski sira bele husu sira-nia pensaun veliche bainhira sira atinje ona idade mínimu ne'ebé legalmente estabelese no kompleta ona períodu mínimu servisu nian.
Relativamente ho ida ne’e, Parlamentu Nasionál aprova ho 37 votus a favor, 0 kontra no 3 Abstensaun, hodi autoriza Governu atu halo lejizlasaun hodi fixa limite idade no kauza sira hakotu relasaun traballu nian iha administrasaun públika ne’ebé prevee iha artigu 116 husi Lei nú 8/2004, loron 16 fulan-juñu nian, aprova Estatutu Funsaun Públika nian, ne’ebé altera husi Lei nú. 5 /2009, 15 Jullu,
Alén de ne’e, Mesa baixa ba Komisaun Finansas Públikas no Komisaun Espesializada sira seluk, Proposta Lei n.º 12/VI (2.ª) – Orsamentu Jeral Estadu ba tinan 2025. Atu nune’e komisaun sira bele prepara kalendáriu ba audiência públikas ho Governu no orgaun sira seluk, molok halo diskusaun no aprovasaun iha Plenáriu.
Antes ida ne’e, Mesa hato’o informasaun kona-ba vizita privada Sua Exia Prezidente Repúblika ba Australia, iha loron 3 to’o 12 fulan outubro tinan 2024, ba Portugal, iha loron 19 to’o 31 fulan outubro tinan 2024, no ba Indonézia iha loron 2 to’o 11 fulan novembro tinan 2024.
Hafoin kontinua ho Bankada FRETILIN hato’o deklarasaun polítika kona-ba sistema saúde pública iha nasaun Timor-Leste, no Bankada KHUNTO koalia kona-ba problema agricultura, saúde, edukasaun, infraestrutura básika no eletrisidade. Alén de ne’e, Deputadu sira aprezenta mos preokupasaun kona-ba, presu bilhete aviaun Aero ba RAEOA ne’ebé sempre aumenta nia folin, problema labarik menor idade faan sasan iha dalan ninin, problema animal lao livre iha estrada, problema lixo iha sidade Díli, no kestaun importante sira seluk ne’ebé precisa atensaun husi Governu.
Sesaun Plenária ne’e prezide husi Prezidente Parlamentu Nasionál, Maria Fernanda Lay, akompaña husi Membru Meza sira no hetan prezensa iha parte dader, Sekretária Estadu Igualdade, Elvina de Sousa Carvalho, representa Vise-Ministru ba Asuntu Parlamentar, no parte lokraik, Vice-Ministru ba Asuntu Parlamentar, Sekretáriu Estadu Komunikasaun Sosial, Prezidente Komisaun Funsaun Públika, no Prezidente Institutu Seguransa Sosial. FIM
