Parlamentu Nasionál liu husi reuniaun plenária ordinária iha loron 3 fulan juñu tinan 2024, halo ona aprovasaun ba Proposta Rezolusaun Nu. 3/VI (1a) kona-ba Ratifikasaun ba Protokolu Adezaun, Repúblika Demokrátika Timor-Leste (RDTL) ba Organizasaun Mundiál Komersiu (OMK) ho votos 33 a favor, 3 kontra no 18 abstensaun.
Alem de ne’e halo mos votasaun ba Projetu Rezolusaun 41/VI (1a) kona-ba Atribuisaun Nasionalidade ba António José Garcia Sampaio, ho votus 35 a favor 15 kontra no 2 abstensaun.
Iha sesaun plenaria ne’e mós Bankada Parlamentar FRETILIN, aprezenta deklarasaun politika ne’ebe ko’alia kona-ba folin sasan ne’ebe kontinua aas iha merkadu, mezmu Governu halo ona politika hodi normaliza iha merkadu sira atu komunidade iha kapasidade hodi bele asesu.
Entretantu iha intervensaun diversa Deputadu sira nian, fó parabens ba labarik sira iha Timor-Leste ne’ebe komemora loron internasionál no nasionál ba labarik, hanesan jerasaun kontinuador Timor-Leste, sujere mós atu Governu kontinua fó atensaun maximu ba setor saude no edukasaun inklui infraestrutura ne’ebe hamosu preokupasaun iha publiku.
Reuniaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Primeiru Ministru, Francisco Kalbuadi Lay, Governador Banco Central Timor-Leste, Helder Lopes no Vise- Ministru ba Asuntu Parlamentar, Aderito Hugo da Costa. FIM
