Parlamentu Nasionál liu husi sesaun plenaria ordinaria iha loron 27 fulan maiu tinan 2024, aprova ona rezolusaun kona-ba kestaun profesór sira kontratadu iha tinan 2023, ho 59 votu a favor, 0 kontra no 0 abstensaun.
Rezolusaun ne’e halo atu apoia ba solusaun problema profesor sira kontratadu ne’ebe durante ne’e akontese no hamosu polemika iha setor edukasaun.
Iha sesaun plenaria ne’e mós Bankada Parlamentar FRETILIN ho KHUNTO aprezenta deklarasaun politika ne’ebe Bankada FRETILIN ko’alia kona-ba setor saude ne’ebe durante ne’e hamosu polemika iha publiku, no Bankada KHUNTO ko’alia kona-ba prosesu dezenvolvimentu liuliu liga ba setor xave sira hanesan edukasaun no saude atu Governu fó atensaun maximu.
Iha intervensaun diversa, Deputadu sira kontinua husu Governu atu fó atensaun no responde ba preokupasaun komunidade sira nian liuliu infraestrutura bazika. FIM
