Pagina Inicial»Noticia
Komisaun E iha Parlamentu Nasionál ne’ebe trata asuntu Infraestrutura, hala’o atividade fiskalizasaun iha Rejiaun Administrativa Espesiál Oe-Cusse Ambeno (RAEOA), iha loron 23 too 24 fulan maiu tinan 2024.
Atividade fiskalizasaun ne’ebe lidera husi Prezidente Komisaun E, Deputadu Marcos Xavier ne’e hahú ho reuniaun entre Prezidente Autoridade RAEOA, Rogerio Tiago Lobato, ho nia sekretáriu rejional sira, hodi ko’alia kona-ba projetu sira ne’ebe lao iha RAEOA liuliu projetu sira ne’ebe lao hela no balun ne’ebe suspende ona.
Prezidente Autoridade RAEOA informa ba Deputadu sira Komisaun E nian katak, dezde simu tomada de posse, hamutuk ho nia sekretáriu rejionál sira observa no verifika projetu sira ne’ebe lao iha RAEOA nune’e bele hatene nia lala’ok no prosesu sira.
Durante reuniaun, Deputadu sira Komisaun E mós sujere atu Prezidente Autoridade ho nia ekipa kontinua monitoriza projetu sira ne’ebe lao daudaun no reavalia ba projetu sira ne’ebe deside ona suspende nune’e la bele prejudika movimentu komunidade sira nian no prosesu dezenvolvimentu ne’ebe lao hela iha RAEOA.
Hafoin reuniaun, Deputadu sira Komisaun E akompaña husi Obras Publikas RAEOA nian hodi halo observasaun ba projetu estrada no ponte iha Postu Administrativu Pante Macassar, aeroportu Rota do Sândalo inklui estrada no ponte diresaun Oesilo.
Iha observasaun ba projetu sira ne’e, Prezidente Komisaun E ho nia membru sira kontinua enkoraja empreza sira ne’ebe responsabiliza obra sira ne’e atu garante nia kualidade no termina tuir nia tempu ne’ebe determina ona iha kontratu. FIM
