Komisaun B Parlamentu Nasionál ne’ebé trata Asuntu Negosius Estrajeirus, Defeza no Seguransa Nasionál, remata ona diskusaun iha especialidade ba Projetu Lei númeru 7/VI/(1ª)- Precidencias ba Protokolu Estadu, iha loron 14 to’o 17 fulan maiu tinan 2024, iha Salaun IADE Munisipiu Liquiçá.
Depois de diskusaun, Prezidente Komisaun B, Deputadu Domingos Augusto Deker, ba media Parlamentu Nasionál hateten, hanesan nasaun ida nebe mak independente no soberanu, tenki iha lei ida kona-ba Protokolu do Estadu, hodi konsidera, organiza no koloka kompozisaun orgaun estadu sira tuir nível nebe mak iha, hahu husi Sua Exia Presidente Repúblika ikus liu autoridade local sira hanesan Xefe Suku no Xefe Aldeia sira, inklui representante Konselhu Kombatentes ba Libertasaun Nasional no organizasaun resistênsia sira.
Presidente Komisaun B, akresenta liu tan katak, maske barak la sita iha lei ne rasik, maibe, iha konkordasia entre komisaun B ho Ministeriu relevante sira hanesan MNEC, Ministério Administrasaun Estatal no husi presidência da Repúblika-Casa civil nebe mak sei sai hanesan autor atu implementa lei ida ne iha ita nia rain. Koalia kona-ba protocolo do estado, iha lei ne’e rassik prevê ona artigo balun nebe ba futuro instituisaun relevante sira sei tur hodi diskuti, hodi fahe kompetensia ba malu, ba futuru organiza eventu nacional ka internacional ruma hodi labele sobreposição iha kompetênsia oinsa atu organiza.
Komisaun B husu lei ida ne’e bele hetan aprovasaun final global lalais iha Parlamentu Nasional i tuir mai Presidente Repúblika ho konpetensia rasik tuir Konstituisaun RDTL haruka bele halo mos promulgasaun.
Diskusaun ne’e rasik presidi husi Presidente komisaun B, Deputado Domingos Augusto Deker, hamutuk ho Deputadu sira Komisaun nian, no hetan presenza husi entidade konvidadu relevante sira.
