Parlamentu Nasionál liu husi sesaun plenária ordinária iha loron 21 fulan maiu tinan 2024, aprova iha final global ba Proposta Lei numeru 7/VI(1ª) – Alterasaun datoluk ba Lei numeru 3/2006, loron 12 fulan abril, Estatutu Kombatente Libertasaun Nasionál, ho 54 votu a favor, 0 kontra no 2 abstensaun.
Alterasaun lei ne’e halo atu kobre no fasilita Governu hodi rezolve preokupasaun veteranu sira nian durante ne’e liga ba kontribuisaun no partisipasaun veteranu no entidade relevante sira.
Iha sesaun plenária ne’e aprova mós votu pezar ba falesimentu saudoza Vitória da Costa Rangel, ho 58 votu a favor, 0 kontra no 0 abstensaun; no votu pezar ba falesimentu saudozu Armando da Costa Sequeira, ho 59 votu a favor, 0 kontra no 0 absntesaun.
Sorin seluk, bankada parlamentar FRETILIN, PLP no KHUNTO aprezenta deklarasaun politika ne’ebe; Bankada FRETILIN ko’alia kona-ba reflesaun tinan 22 restaurasaun independensia liga ba unidade nasional no konsensu nasionál ba interese estadu no povu Timor-Leste. Bankada PLP ko’alia kona-ba sistema saúde ho nia atendimentu durante ne’e; Bankada KHUNTO ko’alia kona-ba setor sira importante ne’ebe bele lori dezenvolvimentu ba nasaun inklui tratamentu ba povo iha área sira importante.
Entretantu iha intervensaun diversa Deputadu sira nian kontinua sujere ba Governu atu rezolve preokupasaun komunidade sira nian liuliu kona-ba nesesidade bazika nian.
Antes termina sesaun plenária ne’e, Deputadu sira mós aprova pedidu viajen estadu Prezidente Republika ba Singapura iha loron 30 fulan maiu too loron 3 fulan juñu tinan 2024.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Ministru ba Asuntu Kombatente Libertasaun Nasionál, Gil da Costa Monteiro “Oan Soru” no Sekretáriu Estadu Veteranu, César dos Santos da Silva no Vice-Ministru ba Asuntus Parlamentares, Adérito Hugo da Costa. FIM
