Komisaun E iha Parlamentu Nasionál ne’ebe trata asuntu Infraestrutura hala’o atividade fiskalizasaun iha Munisipiu Lautem, iha loron 15 too 17 fulan maiu tinan 2024.
Atividade fiskalizasaun ne’ebe lidera husi Prezidente Komisaun, Deputadu Marcos Xavier ne’e hahú ho reuniaun entre Prezidente Autoridade Munisipiu Lautem, Mélio de Jesus, akompaña husi diretor sira hanesan Diretor Obras Publikas, EDTL, Agua no Saneamentu, Trasnporte no Rodoviaria, SMASA no PDIM.
Durante reuniaun, Prezidente Autoridade Munisipiu Lautem ho nia diretor sira aprezenta ba Deputadu sira Komisaun E kona-ba projetu sira ne’ebe lao iha munisipiu refere liuliu projetu emerjensia sira.
Hafoin reuniaun, iha loron tuir mai, Deputadu sira Komisaun E akompaña husi Diretor Obras Publikas, observa projetu emerjensia sira iha munisipiu refere hanesan; reabilitasaun estrada diresaun Posto Lore, reabilitasaun estrada iha Suku Fuiloro no Ponte Sika ne’ebe ameasa atu kotu.
Iha observasaun ba projetu sira ne’e, Deputadu sira sujere ba empreza ne’ebe responsavel atu halo reabilitasaun ho diak no tuir nia tempu atu komunidade sira bele uza ho di’ak no husu atu Obras Publikas Munisipiu nian kontinua akompana projetu sira ne’e too termina. FIM
