Parlamentu Nasionál liu husi reuniaun plenária ordinária, iha loron 13 fulan maiu tinan 2024, halo diskusaun no votasaun ba falesimentu saudoza Helen Mary Hill, ho 47 votu a favor, 0 kontra no 0 abstensaun.
Votu pezar ne’e halo hodi konsidera saudoza nia kontribuisaun ba luta libertasaun nasionál, no iha prosesu dezenvolvimentu nasionál liuliu iha area edukasaun no direitus umanus durante ne’e.
Iha sesaun plenaria ne’e mós anunsia ba Deputadu sira kona-ba vizita Estadu Majestade Sultaun Brunei Darussalam mai iha Timor-Leste hodi partisipa iha selebrasaun Aniversáriu Restaurasaun Independénsia ba dala 22o nian, iha loron 20 fulan maiu tinan ida-ne’e.
Hafoin anúnsiu, kontinua kedas ba deklarasaun politika husi bankada parlamentares hanesan: Bankada FRETILIN ko’alia kona-ba problema saúde, Bankada KHUNTO ko’alia mós kona-ba saúde, komersiu no industria, Bankada PD ko’alia kona-ba pozisaun politika PD relasiona ho salariu minimu iha Timor-Leste.
Entertantu iha intervensaun diversa, Deputadu sira kontinua hato’o ba Governu liu husi ministériu relevante sira atu rezolve lalais problema saúde, edukasaun, infraestrutura, inklui asuntu importante sira seluk.
Reuniaun plenaria ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Ministru ba Asuntu Parlamentar, Aderito Hugo da Costa. FIM
