Parlamentu Nasionál liu husi Komisaun A ne’ebe trata asuntu Kontitusionál no Justisa, iha loron 8 too 10 fulan maiu tinan 2024, halo fiskalizasaun ba Prizaun Ermera no inklui vizita komunidade iha Hatu-lia Munisípiu Ermera.
Prezidente Komisaun A, Deputadu Patrocinio dos Reis Fernandes, hatete atividade fiskalizasaun ne’e halo bazeia ba kompetensia Parlamentu Nasionál nian nomos karta koñesimentu ne’e Komisaun A simu.
Nune’e Deputadu sira Komisaun A realiza atividade fiskalizasaun ne’e atu haree diretamente kondisaun no realidade iha terenu inklui rona preokupasaun sira hanesan guarda prizonal sira no disputa rai ne’ebe akontese iha Hatulia Ermera, hodi bele buka solusaun tuir kompetensia ne’ebe mak iha.
Durante fiskalizasaun, Komisaun A simu informasaun ka preokupasaun husi ekipa guarda prizaun kona-ba kondisaun no fasilidade servisu, estatutu propriu ba guarda prizonal inklui preokupasaun sira seluk.
Entretantu iha Hatulia Ermera, Deputadu sira rona preokupasaun husi komunidade sira kona-ba disputa rai ne’ebe lori ona tempu naruk maibé seidauk iha solusaun, nune’e liu husi atividade fiskalizasaun refere Komisaun A bele tulun komunidade sira liu ministeriu relevante hodi solusiona. FIM
