Parlamentu Nasionál, liu husi sesaun plenária ordinaria, iha loron 30 fulan abril tinan 2024, halo aprovasaun ba edisaun sira Jornál Parlamentu Nasionál nian, serie I-A/no 10, ba loron 24 fulan jullu tinan 2023 no serie I-A/no11, ba loron 31 fulan jullu tinan 2023, ho votus 56 a favor ,0 kontra no 1 abstensaun.
Sesaun plenaria ne’e mós Bankada Parlamentar KHUNTO aprezenta deklarasaun politika ne’ebe ko’alia kona-ba ordenamentu Kapital Díli liga ba espasu publiku no estatutu rai.
Entretantu iha intervensaun diversa Deputadu sira nian ko’alia kona-ba preokupasaun publiku liga ba kobransa ilegal ne’ebe deskonfia mosu iha rekrutamentu traballador sira husi SEFOPE no tratamentu pasaporte iha Ministeriu Justisa nian, ne’ebe husu atu Governu fó atensaun seriu no halo investigasaun ba aktu refere.
Deputadu sira mós kontinua informa ba Governu liu husi ministeriu kompetente sira atu rezolve preokupasaun sira ne’ebe povu enfrenta.
Sesaun plenaria ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira. FIM
