Parlamentu Nasionál liu husi sesaun plenária ordinária iha loron 23 fulan abril tinan 2024, aprova ona iha final global ba Projetu Lei numeru 3/VI(1ª) – Rejime Juridiku ba Ezersisiu Direitu Petisaun.
Rejime Juridiku ne’e atu fasilita sidadaun hotu hodi aprezenta petisaun liga ba asuntu nasional ka publiku hodi Deputadu sira bele diskute tuir tramitasaun ne’ebe mak iha.
Iha sesaun plenária ne’e mós aprova ho unanimidade ba votu kongratulasaun ba aniversariu Revolusaun 25 abril, ba dala 50.
Sesaun ba votasaun ne’e assisti direta husi Embaixadora Portugal iha Timor-Leste, Maria Manuela Freitas Bairos.
Alem de ne’e Bankada Parlamentar FRETILIN mós aprezenta deklarasaun politika ne’ebe ko’alia kona-ba kresimentu ekonomiku iha governasaun ida-ne’e.
Entretantu iha intervensaun diversa nian, Deputadu sira aprezenta preokupasaun kona-ba projetu sira ne’ebe lao daudaun, professor sira kontratadu inklui funsionariu sira no prosesu eviksaun iha capital Díli ne’ebe hamosu preokupasaun iha komunidade sira.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira. FIM
