Parlamentu Nasionál liu husi sesaun plenária ordinária iha loron 22 fulan abril tinan 2024, halo ona diskusaun no aprovasaun ba Proposta Lei numeru 6/VI(1ª) – alterasaun daruak ba Lei numeru 8/2009, loron 15 fulan jullu, kona-ba Lei Anti Korupsaun.
Aprovasaun iha generalidade no final global ho 37 votus a favor, 0 kontra no 0 abstensaun ne’e, Deputadu sira no Governu liu husi Ministeriu Justisa konsentra ba artigu rua ne’ebe hetan alterasaun, liuliu kona-ba nomeasaun ka eleisaun ba Komisariu Komisaun Anti Korupsaun.
Iha intervensaun Deputadu sira relata katak importante tebes altera lei refere tanba tinan ida resin la iha Komisariu sira ne’ebe lidera instituisaun refere hodi hala’o nia funsaun.
Entretanto iha período de antes da ordem do nian, Bankada FRETILIN aprezenta deklarasaun politika ne’ebe ko’alia kona-ba eviksaun forsada iha kapital Díli ne’ebe hamosu preokupasaun iha publiku liuliu komunidade afetadu sira.
Deklarasaun politika refere hetan apoiu no reasaun husi Deputadu sira seluk, ne’ebe sujere atu Governu bele haree nia mekanizmu eviksaun atu minimiza efetivu negativu ba povu.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membro Meza sira no hetan prezensa husi Ministru Justisa ho Vise-Ministru Asuntu Parlamentar. FIM
