Komisaun E iha Parlamentu Nasionál ne’ebe trata asuntu Infraestrutura, hala’o atividade fiskalizasaun iha Munisípiu Manufahi, iha loron 17 no 18 fulan abril tinan 2024.
Atividade fiskalizasaun ne’ebe lidera husi Prezidente Komisaun E, Deputadu Marcos Xavier ne’e hahú ho reuniaun entre Prezidente Autoridade Munisipiu Manufahi akompaña husi Diretor sira ho Deputadu sira Komisaun E nian.
Durante reuniaun, Prezidente Autoridade Munisípiu Manufahi, Luis Marcal da Costa Tavares, ho nia Diretor sira atualiza ba Deputadu sira kona-ba lala’ok no progresu projetu sira iha Munisipiu refere.
Alem de ne’e, informa mós kona-ba instalasaun eletrisidade iha área rural sira, bee moos ba komunidade inklui Uma Naroman ba Povu.
Iha oportunidade ne’e, Prezidente Komisaun E ho nia membru sira mós husu klarifikasaun liuliu kona-ba projetu emerjensia ne’ebe lao iha Munisipiu refere.
Deputadu sira sujere atu iha implementasaun projetu sira presija iha akompañamentu maximu husi autoridade Munisipal liuliu ADN no Obras Publikas iha Munisipiu atu garante nia kualidade no efetividade konstrusaun.
Hafoin reuniaun, iha loron tuir mai, Deputadu sira Komisaun E akompaña husi tekniku sira Obras Publikas no ADN hala’o fiskalizasaun ba projetu emerjensia sira hanesan kontrusaun ponte, konstrusaun moru protesaun no jardim multifunsaun iha munisipiu refere. FIM
