Parlamentu Nasionál, liu husi reuniaun plenária ordinária, iha loron 15 fulan abril tinan 2024, halo apresiasaun no diskusaun ba relatóriu no pareser kona-ba ezekusaun orsamentál trimestral dahat ba Tinan Finanseiru 2023 nian.
Apresiasaun ne’e hahú ho halo leitura ba relatóriu no pareser husi Komisaun C ne’ebe trata asuntu Finansas Públikas. Relatoriu ne’ebe komisaun aprezenta hatudu 87% husi total Orsamentu Jerál Estadu 2023 ho montante $ 1.9 bilhões. No iha rekomendasaun lubuk ida ne’ebe Governu no instituisaun relevante sira konsidera iha orsamentu tuir mai.
Iha intervensaun Deputadu sira nian apresia ho ezekusaun refere maibé husu Governu liuliu Ministeriu Finansas atu haree kualidade implementasaun husi ezekusaun refere, tanba haree husi aspetu Lei Enkuadramentu Orsamental (LEO), presija iha kumprimentu balun ne’ebe Governu konsidera.
Entretantu Governu liu husi Ministeriu Finansas, apresia ba relatóriu Komisaun C nian no ezekusaun refere hatudu pojitivu maske nune’e Governu kontinua konsentra ba kualidade implementasaun no ezekusaun orsamentu.
Apresiasaun ba relatório ne’ebe lidera husi Prezidente Parlamentu Nasionál, Maria Fernanda Lay, ne’e hetan prezensa husi Ministra Finansas, Santina José Rodrigues F. Viegas Cardoso, akompaña husi Vise-Ministra Finansas ho Vise-Ministru ba Asuntu Parlamentar. FIM
