Parlamentu Nasionál liu husi sesaun plenária ordinária iha loron 9 fulan abril tinan 2024, realiza debate urjensia ho Governu liu husi Ministeriu Saude, Ministeriu Interior no Ministeriu Agrikultura, Pekuaria, Peska, no Floresta, hodi diskute kona-ba moras ka surtu Raiva Canina ne’ebe oras ne’e akontese iha RAEAO.
Debate urjensia ne’e hahú ho aprezentasaun situasaun jeral liga ba moras Raiva Canina, husi Ministra Saude, Elia A. A. dos Reis Amaral no Ministru Agrikultura, Pekuaria, Peska no Floresta, Marcos da Cruz.
Iha aprezentasaun refere, Governu rekoñese ejisti moras Raiva Canina ne’ebe mai husi animal liuliu asu, lekirauk no busa iha RAEOA ho nia impaktu ba ema ka komunidade iha área refere.
Governu mós halo ona medida prevensaun sira oinsa minimiza moras refere daet ka aumenta iha komunidade nia leet, liu husi vasinasaun no seluktan.
Hafoin aprezentasaun, Deputadu sira husu atu Governu liu husi ministériu kompetente sira halo prevensaun liuliu sosializasaun ba komunidade sira oinsa preven husi moras refere.
Deputadu sira mós husu atu halo kontrolu maximu ba área fronteira sira no halo vasinasaun ba animal sira liuliu asu, busa ne’ebe komunidade sira hakiak. FIM
