Parlamentu Nasionál liu husi Komisaun A ne’ebe trata asuntu Konstitusionál no Justisa, iha loron 3 fulan abril tinan 2024, hahú ona halo diskusaun ba Projetu Lei numeru 3/VI(1ª) – Rejime Juridiku ba Ezersisiu Direitu Petisaun, iha especialidade.
Diskusaun ne’ebe lidera husi Prezidente Komisaun A Deputadu Patrocino dos Reis ne’e hetan prezensa husi Vise Ministru ba Asuntu Parlamentar, Aderito Hugo da Costa, Adjuntu Prokuradoria Jerál Republika, Jacinto Soares Babo, Adjuntu Provedoria ba Direitu Umanu no Justisa no Vise-Ministru Justisa.
Diskusaun espesialidade ne’e hahú husi justifikasaun no objetivu husi lei refere no kontinua ba artigu sira iha projetu lei refere. Projetu lei ne’e rasik mai ho ispiritu husi artigu 48 Konstituisaun Republika Demokratika Timor-Leste.
Durante diskusaun, Deputadu sira hamutuk ho autor judisiariu sira diskute klean kona-ba artigu sira ho nia ispiritu no implementasaun iha futuru.
Tuir ajenda diskusaun, Komisaun A hamutuk ho autor judisiariu sira sei halo diskusaun durante loron haat, hahú husi loron 3 too 6, iha Munisipiu Aileu. FIM
