Parlamentu Nasionál, liu husi sesaun plenária ordinária iha loron 25 fulan marsu tinan 2024, preokupa ho virus rabies ne’ebe hamate ona pasiente balun husi RAEOA no numeru pasiente pozitivu aumenta ba na’in 21.
Situasaun ne’e Deputadu sira preokupa no sujere ba Governu liuliu ministeriu kompetente atu halo kontrolu no prevensaun maximu liuliu iha fronteira sira. Ministeriu relevante mós halo ona vasina ba animal sira liuliu asu ne’ebe populasaun sira hakiak.
Sorin seluk, Deputadu sira mós sujere ba empreza sira ne’ebe hetan fiar hodi rekolla lixo iha kapital Díli atu fó ekipamentu protesaun ba traballador sira bainhira hala’o atividade. Kontrolu no rezolve infraestrutura bazika inklui asuntu importante sira seluk.
Iha sesaun plenária ne’e mós Bankada FRETILIN aprezenta deklarasaun politika ne’ebe ko’alia kona-ba dezenvolvimentu kampu Greater Sunrise. No Bankada KHUNTO aprezenta deklarasaun politika hodi ko’alia kona-ba preokupasaun vendedor sira ne’ebe hetan eviksaun husi autoridade kompetente, eskola sira iha area rural no folin foos ne’ebe aumenta iha munisipiu sira.
Sesaun plenaria ne’e, prezide husi Prezidente Parlamentu Nasional em Ezersisiu, Maria Terezinha Viegas, akompaña husi membru Meza sira no hetan prezensa husi Vise-Ministru ba Asuntu Parlamentar, Aderito Hugo da Costa. FIM
