Prezidente Parlamentu Nasionál em Ezersisiu, Maria Terezinha Viegas da Silva akompaña husi Membru da Meza no Presidente Komisaun A, Deputadu Patrocino dos Reis, simu audiénsia husi Asosiasaun ema ho Difisiente Timor-Leste (ADTL) ne’ebe lidera husi Sr. Gabriel dos Santos ho nia equipa sira, iha loron 21 fulan marsu tinan 2024, iha Sala Konferénsia Parlamentu Nasionál.
Tuir portavos, Gabriel dos Santos, hatete, objetivu audiénsia ida ne’e, atu hato’o sira nia lamentasaun hasoru Goverrnu, espesialmente ba Ministeriu Solidaridade Sosial no Inkluzaun atu bele altera montante subsídiu seguransa sosial ba invalides ne’ebe maka istipula iha alterasaun dahuluk Dekretu Lei Nu.8 /2024. Tuir Portavos ADTL ne’e katak, bazeia ba Konstitusaun Repúblika Demokrátika Timor-Leste, artigo 21, hatete, ema ho difisiente sira hetan direitu no obrigasaun hanesan sidadaun sira seluk. Inklui konvensaun Internasional lubuk ida Estadu ne’e ratifika maibe lei ne’e halo diskriminasaun ba ema ho difisiente iha Timor-Leste. Portavoz ne’e mos kestiona tamba sa ema ho difisiente hetan subsidiu montante $60.00 ( nen nulu dólar amerikanu) kada fulan 3, enquanto sidadaun sira seluk, fulan-fulan hetan liu ida ne’e, Portavoz ne’e mos hatutan tan katak tanba sá maka MSSI sei uja liafuan Invalides invés de uja Ema ho Difisiente tuir ita nia KRDTL haruka?. Nune’e, ADTL ohin mai hato’o ba Parlamentu nudar Representante povu iha Estadu ida ne’e atu husu Governu bele rezolve asuntu diskriminativu iha lei refere.
Hatan ba kestaun ne’e, Prezidente Parlamentu em Ezersisiu hateten, “lori Parlamentu Nasionál nia naran konsidera ba asuntu importante sira ne’ebe maka levanta ona, no iha tempo badak Meza sei halo koordenasaun ho Prezidente Komisaun F, ne’ebe trata asuntu relevante, inklui Komisaun A no konvida Ministra no ADTL sira, hodi halo audiénsia hamutuk atu bele rona direta Ministra nia razaun ba asuntu sira ne’e. Karik iha duni razaun importante foka ba asuntu sira ne’e atu ita altera maka ita sei la’o tuir presedur lejislativu nian para halo alterasaun”. FIM
