Parlamentu Nasionál Hili Membru Konsellu Superior Ministeriu Publiku nian Parlamentu Nasionál, liu hosi reuniaun plenária ordinária, iha loron 18 fulan marsu tinan 2024 halo eleisaun ba membru efetivu no suplente ba iha Konsellu Superior Ministeriu Publika nian, ne’ebe ho votasaun 40 a favor, 14 abstensaun no 6 kontra.
Membru nain rua ba Konsellu refere, mai hosi proposta Bancada Parlamentar CNRT nian ho naran hanesan tuir mai: Dr. Filipe Rodrigues Pereira nudar efetivu no Dr. Avelino Maria Coelho da Silva nudar suplente.
Antes halo eleisaun ne’e, Meza hahu uluk ho anunsiu membru ba Konsellu Administrasaun hosi Bankada Parlamentar PD nian, hanesan Deputada Maria Teresa da Silva Gusmão nudar efetivu no Deputada Sancha Margarida Tilman nudar suplente.
Meza kontinua kedas ho ajenda ditribuisaun Relatoriu Fiskalizasaun Komisaun B, ne’ebe trata Asuntu Negosiu Estranjeiru , Defeza no Seguransa iha RAEOA Oecusse.
Iha reuniaun ne’e mos , iha deklarasaun Parlamentar hosi Fretilin ne’ebe koalia konaba osan 30 milloens lakon iha mandatu VIII Governu nian, ne’e la los! tanba tuir Fretilin katak osan refere iha hela konta bankaria suku benefisiariu sira nian no la iha indikasaun membru VIII Governo ne’ebe uja osan refere kontra sistema jestaun finanseira Transferensia Publika nian. Iha fatin hanesan, Partidu Khunto mos husu atu Governu tau atensaun ba iha infreastrutura no agrikultura iha área remotas, tamba tuir Partidu Khunto nian hanoin katak área rua ne’e sei iha problema.
Enquanto, iha intervensaun Deputadu sira nian, Deputadu sira husu atu Governu kria loja iha estrada publiku hanesan mos loja Xineza sira nian, nune’e bele fo fatin ba iha vendedor estrada atu uja hodi bele fa’an sira nia produtu no ho tempo hanesan sira bele fo arendamentu ba Estadu. Alein de ida ne’e, Deputadu sira preokupa mós ho dezenvolvimentu infrastrutura iha baze hanesan estrada, kanu irigasaun, ponte, be no eletrisidade ne’ebe at no fo impaktu negativu ba movimentu povo nian, agricultura no inundasaun iha munispiu ba to’o iha baze. Tamba ne’e husu ministériu relevante atu halo atuasaun lalais tuir nesesidade ne’ebe maka iha , inklui asuntu importante sira seluk.
Reuniaun ne’e prezide hosi Prezidente Parlamentu Nasional, Maria Fernanda Lay, akompaña hosi membru Meza sira no hetan prezensa hosi Vise-Ministru ba asuntu Parlamentar nian, Aderito Hugo da Costa. FIM
