Parlamentu Nasionál, liu husi Komisaun C, ne’ebe trata asuntu Finansas Públikas, halo fiskalizasaun ba Ministeriu Finansas, liu hosi halo audiensia ho Ministra Finansas, Santina Cardoso ho nia ekipa sira ,iha loron 14 fulan marsu tinan 2024, iha Sala Auditoria Ministériu Finansas nian.
Fiskalizasaun ne’e rasik, lidera husi Prezidente Komisaun C, Deputada Cedelizia Faria dos Santos, akompaña husi Vise, Sekretária no membru sira komisaun nian.
Haktuir husi Prezidente Komisaun C, iha entrevista ho media Parlamentu Nasionál katak, objetivu hosi fiskalizasaun ida ne’e atu hatene informasaun lubuk ida husi Ministra Finansas konaba ezekusaun Orsamentu Jeral Estadu (OJE) nian ba tinan 2023, inklui Orsamentu Ratifikativu ne’ebe maka IX Governu Konstitusional aprova ona.
Alein de ne’e, atu hatene razaun ezekusaun OJE 2024 nian, ne’ebe tuir Komisaun C nia hare katak kik tebes, 5,1% iha trimestral dahuluk ne’e, inklui atu husu mos informasaun liga mos ba Alterasaun Lei Enquadramentu Orsamental (LEO) nian, Governu iha inisiativu atu apresenta ba Parlamentu Nasional ga lae? Nune’e, karik Ministeriu Finansas la iha inisiativu, maka Parlamentu Nasionál liu hosi Komisaun C, bele aprezenta projetu Lei atu halo alterasaun ba lei refere nune’e bele halo ajustamentu ba iha implementasaun OJE 2024 nian. Hatan ba questaun ne’e, Ministra finansas hatete katak, Ministeriu Finansas agora dadaun iha hela prosesu konsultasaun entre liña ministerial hodi estuda didiak ba alterasaun iha LEO nian no iha tempu badak sei aprezenta ba Parlamentu Nasionál.
Aleim de ne’e , Komisaun C mos, husu atu Ministeriu Finansas implementa ona Lei ba taxa be mineral nian, tamba tuir fiskalizasaun Komisaun C nian iha portu tibar katak, implementasaun lei ba taxa be mineral seidauk implementa no koalia mos asuntu importante seluk liga ba iha regulamentu no ezekusaun orsamentu nian. FIM
