Parlamentu Nasionál liu hosi reuniaun plenária ordinária, iha loron 12 fulan marsu tinan 2024 kontinua ejiji Governu liu hosi Ministeriu Saude atu halo metigasaun ba moras dengue ne’ebe iha tempu udan ne’e nia numeru aumenta ba bebeik inklui husu mos sosiadade sira atu servisu hamutuk hodi hamos uma no bairo laran.
Alein de ida ne’e, Deputadu sira husu Governu liu hosi ministériu relevante sira seluk atu kontrola ba iha jardim sira iha Dili laran hodi buras no moos, inklui kontrolu kadeira sira ne’ebe mak fornese ona iha jardim sira hodi assegura ba sustentabilidade iha futuru.
Iha sorin seluk, Deputadu sira kontinua fo exigência ba Governu atu toma medidas imediata hodi resolve problemas relasionadu ho dezenvolvimentu infreastrutura sira hanesan ponte, estrada, no eletrisidade ne’ebe mak a’at durante tempu udan no afeta ba movimentu, no seluk tan. Membru Parlamentu Nasionál sira mos husu atu Governu presisa planu ne’ebe adequadu hodi hamos lixu no baleta be’e nian iha Dili laran para lebele hamosu moras sira no inundasaun inklui asuntu importante sira seluk.
Iha reuniaun ne’e mos, Bankada Parlamentar KHUNTO, liu hosi nia deklarasaun politika koalia kona-ba spasu publiku hanesan jardim iha Dili laran seidauk iha kontrolu ne’ebé maximu ba sustentabilidade iha futuru, tamba ne’e husu ba Governu atu hamosu politika estratégia ida ne’ebe adequadu hodi halo kontrolu no manutensaun ba jardim sira.
Reuniaun ne’e prezide hosi Prezidente Parlamentu Nasionál, Maria Fernanda Lay ne’ebe akompaña hosi membru Meza sira no hetan prezensa hosi Vise-Ministru ba Asuntu Parlamentar nian, Sr. Aderitu Hugo da Costa. FIM
