Parlamentu Nasionál, liu husi reuniaun plenária ordinária iha loron 11 fulan marsu tinan 2024, halo diskusaun no aprovasaun ba Projetu Rezolusaun Nu.32/VI(1a) kona-ba alterasaun da-ruak ba iha Rezolusaun Parlamentu Nasionál Nu.16/2003, fulan maio nian, ne’ebe aprova Rejime Subsídiu Deputadu Parlamentu Nasionál nian, ho votus unanimidade, 57 votus a favor, 0 kontra no 0 abstensaun.
Reuniaun ne’e hahu ho leitura ba justifikasaun faltas husi Deputadu Luis Roberto da Silva; Leitura ba subtituisaun Deputadu Luis Roberto da Silva husi Partidu KHUNTO ba Membru Konsellu Administrasaun no-mos distribuisaun no apresiasaun ba relatóriu fiskalizasaun komisaun E ne’ebe trata asuntu infraestrutura iha minisípiu Dili no Baucau.
Além de ne’e, iha mos deklarasaun polítika husi Bankadas Parlamentares hanesan, FRETILIN, KHUNTO no PLP, husi Bankada FRETILIN koalia kona-ba bolsa hakbi’it ba estudante sira ne’ebe mai husi família kbi’it laek ne’ebe mak IX Governu Konstitusionál hapara ona, FRETILIN husu atu Governu bele foti solusaun imediata ba estudante sira ne’e hodi kontinua sira nia edukasaun iha futuru; Partidu KHUNTO husu ba Governu liu husi Ministériu relevante sira atu toma atensaun ba iha sosial mídia ne’ebe maka utiliza ID-falsu hodi defama personalidade ema nian, alen de ne’e, husu mos atu labele halo deskriminasaun ba professores kontratadu sira; No Partidu PLP, liu husi nia deklarasaun politíka hato’o parabéns ba susesu boot ba asina akordu ba Adezaun Timor-Leste hodi sai membru ba dala 126 ba iha Organizasaun Komersiu Mundial nian, masque nune’e, PLP mos idetifika dezafiu lubuk ida iha adezaun refere no hato’o mos rekomendasaun lubuk ida hodi fo solusaun ba desafiu sira ne’e.
Iha intervesaun diversas, Deputadu sira husu ba Governu liu husi ministériu relevante sira atu halo atuasaun imediata ba iha estrada, be’e mo’os no ponte sira ne’ebe maka hetan estragus tanba impaktu husi udan boot, iha munisipiu Dili, Manatutu, Bobonaru, Ermera no Viquque, inklui husu atu hadiak dalan mota nian ne’ebe hamosu inundasaun iha suku Alas Kolokau nian. Aleinde ida ne’e, husu mos Minstériu Agrikultura atu haruka estesionista sira bele resolve problema pesti ne’ebe han populasaun sira nia ai’horis iha Fatuberliu ho asuntu importante sira seluk.
Plenaria ne’e prezide hosi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Ministru ba Asuntu Parlamentar nian, Aderitu Hugo da Costa. FIM
