Parlamentu Nasionál liu husi sesaun plenária ordinária iha loron 05 fulan marsu tinan 2024, iha período da Ordem do Dia, Mesa anúnsiu admisaun no baixa ba komisaun A, nebe trata assuntu Konstituionais no Justisa ba projetu Lei n.º 5/VI (1.º) – segunda alterasaun ba Estatutu Funsionárius Parlamentares aprova ho Lei nº. 10/2016, de 8 de jullu.
Entretantu, Bankada Parlamentar PD, representa husi Deputadu Armando dos Santos, hato’o deklarasaun polítika kona-ba kompeténsia polítika lejislativa no folin sasan necessidade básiku inkluindu produtu alimentar; Bankada Parlamentar FRETILIN, representa husi Deputadu Antoninho Bianco hato’o deklarasaun polítika kona-ba implemtasaun projetu infraestrutura; Bankada Parlamentar KHUNTO, representa husi Deputado António Verdial de Sousa, hato’o deklarasaun politika kona-ba setor agrikultura, setor edukasaun no mos setor saúde.
Iha intervensaun diversas, Deputadu sira kontinua aprezenta problema sira mak hanesan, edukasaun, saúde, be moos, lixo iha Díli laran, estradas, eletrisidade, folin fos, kasa ilegal, normalizasaun irigasaun, falta laboratorium ba teste aihan importasaun nian no problema social sira seluk.
Relasiona ho problema sira ne’e, Vise-Ministru ba Asuntu Parlamentar, Adérito Hugo da Costa hatete, assuntu sira nebe’e hato’o iha deklarasaun polítika sira ne’e, sei hato’o ba linha ministeriais relevante, hodi toma nota no hare iha implementasaun sira iha terrenu. Governu kontinua nafatin tau matan no avalia nafatin servisu sira iha baze, no buka solusaun hodi resolve problema sira ne’ebe komunidade hasoru iha baze. Informasaun sira seluk halo rejista no hato’o ba ministério relevante hodi fo resposta teknika ho planu no orsamentu konkreto mai Parlamentu Nasionál.
Sesaun plenária ne’e prezide husi Prezidente Parlamentu Nasionál, Deputada Maria Fernanda Lay, akompaña husi membro meza sira no hetan prezensa husi Vise-Ministru ba Asuntu Parlamentar, Adérito Hugo da Costa. FIM
