Parlamentu Nasionál liu husi sesaun plenária ordinária iha loron 04 fulan marsu tinan 2024, iha período da Ordem do Dia, Mesa anúnsiu admisaun no baixa ba komisaun A, nebe trata assuntu Konstituionais no Justisa ba projetu Lei n.º 6/VI (1.º) kona-ba Mandatu Titulares ou Membrus Orgauns designadus husi Parlamentu Nasionál.
Entretantu, Bankada Parlamentar FRETILIN, representa husi Deputada Nurima Ribeiro Alkatiri hatoo deklarasaun politika kona-ba situasaun dezempregu iha ita nia rai; Bankada Parlamentar KHUNTO, representa husi Deputado António Verdial da Silva Ferreira, hato’o deklarasaun politika kona-ba setor sosiál, setor edukasaun no mos setor ekonomia iha Nasaun Timor-Leste. Nune mos GMPTL representa husi Deputada Lucia Taeki, hatoó deklarasaun kona-ba komemorasaun loron internasionál ba feto sira.
Iha intervensaun diversas, Deputadu sira kontinua aprezenta problema sira mak hanesan, edukasaun, saúde, be moos, ro japonese YUSHIN MARU neébé atraka iha Díli, lixo iha Díli laran, originalidade tais Timor nian, qualidade kafé, estradas, introduz hikas sistema bording pas ba-mai iha fronteiras terrestres entre Timor-Leste ho Indonésia, passaporte estudante timor-oan iha Filipina neebé expire ona no problema social sira seluk.
Relasiona ho problema sira ne’e, Vise-Ministru ba Asuntu Parlamentar, Adérito Hugo da Costa hatete, oras ne’e dadaun Governu komprometidu ba nia komprimisiu sira ne’ebé deskreve ona tuir metas ne’ebé iha no tuir orsamentu ba tinan 2024 ne’ebé aloka ona ba kada ministério. Governante ne’e, informa liu tan katak problema sira ne’ebé lenata husi Deputadu sira, Ministériu relevante sei hato’o resposta por eskrita detalhadamente mai Parlamentu Nasionál.
Sesaun plenária ne’e prezide husi Prezidente Parlamentu Nasionál, Deputada Maria Fernanda Lay, akompaña husi membro meza sira no hetan prezensa husi Vise-Ministru ba Asuntu Parlamentar, Adérito Hugo da Costa. FIM
