Deputadu sira iha Parlamentu Nasionál liu husi sesaun plenária ordinária iha loron 27 fulan fevereiru tinan 2024, kontinua sujere ba Governu atu rezolve asuntu edukasaun no saúde ne’ebe too agora sai polemika.
Asuntu saúde no edukasaun importante tebes ba povo no estadu, nune’e Governu iha responsabilidade maximu hodi solusiona problema ne’ebe akontese, hanesan menuz professor no pessoal saúde sira iha sentru saúde sira.
Bankada Parlamentar KHUNTO, iha nia deklarasaun politika hatete setor edukasaun importante tebes ba sustentabilidade nasaun ida nian, liga ba economia, rekursu umanu no seluktan.
Entretantu Bankada Parlamentar FRETILIN, iha nia deklarasaun politika ko’alia kona-ba folin sasan ne’ebe kontinua aumenta iha merkadu maski taxa menu zona, tanba ne’e Governu presija fó atensaun maximu ba asuntu refere.
Vise-Ministru ba Asuntu Parlamentar, Adérito Hugo da Costa hatete, oras ne’e dadaun Governu rezolve ona preokupasaun sira hanesan iha área saúde nian, Ministeriu Edukasaun halo ona rekrutamentu no tempu besik hala’o ona funsaun iha sentru saúde sira, no iha área edukasaun nian Ministeriu Edukasaun mós hala’o ona prosesu rekrutamentu ba professor sira tuir politika Governu nian, inklui asuntu sira seluk ne’ebe Governu konsidera importante no urjente atu responde.
Iha período da ordem do dia nian, Deputadu sira aprova Jornal do Parlamento Nacional Serie I-A/numeru 9, loron 19 fulan jullu tinan 2023, ho 39 votus a favor, 0 kontra no 7 abtensaun.
Sesaun plenária ne’e prezide husi Prezidente Parlamentu Nasionál Interiña, Deputada Maria Terezinha Viegas, akompaña husi membro meza sira no hetan prezensa husi Vise-Ministru ba Asuntu Parlamentar, Adérito Hugo da Costa. FIM
