Pagina Inicial»Noticia
Komisaun F iha Parlamentu Nasionál ne’ebe trata asuntu Saúde, Seguransa Sosiál no Igualdade Jéneru realiza Konferénsia Munisipál iha loron 23 fulan fevereiru tinan 2024, iha Munisipiu Baucau.
Konferénsia Munisipál ne’ebe abertura husi Prezidente Parlamentu Nasionál interiña, Deputada Maria Terezinha Viegas, ne’e hahú ho intervensaun husi Sekretária Munisipál Baucau, reprezentante UNICEF no Vise-Ministra Solidariedade Sosial, ne’ebe ko’alia kona-ba Garante Protesaun ba Labarik no Jovem iha Timor-Leste.
Iha diskursu abertura, Prezidente Parlamentu Nasionál interiña hatete Lei numeru 6/2023, 1 Marsu – Lei de Proteção das Crianças e Jovens em Perigo, ne’e importante tebes ba Estadu no povu Timor-Leste tanba bele garante direitu labarik sira nian ho diak no dignu tuir lei haruka.
Tanba ne’e liu husi konferénsia munisipál, importante tebes autoridade implementadór sira presija hatene lala’ok lei refere atu garante no proteje duni labarik sira.
Iha konferénsia munisipál ne’e envolve entidade kompetente sira inklui estudante no komunidade iha Munisipiu Baucau.
Durante konferénsia, autoridade kompetente hanesan Ministeriu Publiku, PDHJ, Polisia, INDDICA, no Deputadu sira Komisaun F halo aprezentasaun kona-ba implementasaun lei refere no responde ba pergunta hirak ne’ebe aprezenta husi partisipante sira.
Konferénsia munisipál hanesan ne’e realiza ona iha Munisipiu Dili, Maliana inklui Baucau no tuir planu sei kontinua ba munisipiu sira seluk. FIM
