Pagina Inicial»Noticia
Parlamentu Nasionál liu husi sesaun plenária ordinária, iha loron 12 fulan fevereiru tinan 2024, halo ona diskusaun no votasaun ba projetu Rezolusaun Parlamentu Nasionál numeru 30/VI (1.a) - Kria Komisaun Eventual ba Akompañamentu Prosesu Adezaun ba Asosiasaun Nasaun Sudeste Aziatiku nian (ASEAN), ho 56 votus a favor 0 abstensaun no 0 kontra.
Membru Deputadu ba Komisaun Eventual ne’e bazeia ba proposionalidade bankada parlamentar sira nian hanesan Bankada CNRT Deputadu nain tolu; Bankada FRETILIN nain rua; Bankada PD nain ida; Bankada PLP nain ida no Bankada KHUNTO nain ida.
Iha sesaun plenaria ne’e mós Bankada Parlamentar FRETILIN ho KHUNTO aprezenta deklarasaun politika ne’ebe; Bankada FRETILIN ko’alia kona-ba rekrutamentu funsionariu sira iha administrasaun publika ho kontratasaun sira ne’ebe iha tendensia politika; Bankada KHUNTO ko’alia kona-ba trafiku umanu ne’ebe akontese ba timoroan sira durante ne’e.
Entretantu iha intervensaun diversa Deputadu sira nian, ko’alia kona-ba lixo iha kapital Díli, negosiante sira okupa espasu publiku inklui asuntu importante sira seluk.
Reuniaun plenária ne’e prezide husi, Prezidente Parlamentu Nasionál, Maria Fernanda Lay, akompaña husi membru Meza sira, no hetan prezensa husi Vise- Ministru ba Asuntu Parlamentar, Aderito Hugo da Costa. FIM
