Pagina Inicial»Noticia
Komisaun C iha Parlamentu Nasionál ne’ebé trata asuntu Finansas Públikas, hala’o atividade fiskalizasaun iha Munisípiu Liquiçá, iha loron 7 too 8 fulan fevereiru tinan 2024.
Atividade fiskalizasaun ne’ebé lidera husi Viseprezidente Komisaun C, Deputadu Francisco da Costa «Ikulay» ne’e hahú ho reuniaun entre Prezidente Autoridade Munisípiu Liquiçá ho nia diretor sira, iha salaun reuniaun Administrasaun Munisipál Liquiçá.
Iha fiskalizasaun ba loron dahuluk, Prezidente Autoridade Munisípiu Liquiçá, Paulino Pereira, hamutuk ho nia diretor sira aprezenta planu no orsamentu sira Munisípiu Liquiçá nian liga ba projetu sira ho nia implementasaun no ezekusaun sira.
Iha kontinuasaun fiskalizasaun ba loron daruak, diretor sira liuliu responsavel PNDS aprezenta implementasaun projetu sira ne’e ho nia orsamentu sira hahú husi tinan 2021 too 2023 no projetu balun ne’ebé sei kontinua iha tinan 2024.
Durante aprezentasaun relatóriu ezekusaun ne’e, Deputadu sira sujere ba ekipa tomak administrasaun munisipál nian atu servisu ho responsabilidade, implementa tuir planu no programa ne’ebé mak iha no esforsu hodi hetan reseita ne’ebé sufisiente iha munisípiu.
Antes termina fiskalizasaun refere, Deputadu sira Komisaun C haree diretamente reabilitasaun no konstrusaun projetu turístiku Koni Leopa Dato.
Sorin seluk Komisaun G mós hala’o atividade fiskalizasaun iha Munisípiu Manufahi durante loron rua. Enkuantu Komisaun sira seluk halo atividade tuir ajenda ne’ebé aprovadu ona. FIM
