Pagina Inicial»Noticia
Parlamentu Nasionál liu husi sesaun plenária ordinária iha loron 5 fulan fevereiru tinan 2024, liu husi eleisaun, nomeia Deputadu Natalino dos Santos Nascimento (Bankada CNRT) ho Deputadu Antoninho Bianco (Bankada FRETILIN), ba membru Konsellu Fiskalizasaun Sistema Nasionál Intelijénsia (KFSNI), ho 56 votu a favor, 1 kontra no 0 abstensaun.
Proposta ba membru KFSNI ne’e mai husi Bankada CNRT ho FRETILIN relasiona ho mandatu membru sira KFSNI ne’ebé termina ona iha loron 31 dezembru tinan 2023 liubá.
Iha período de antes da ordem do dia nian, Bankada FRETILIN liu husi Deputada Maria Anabela Savio, aprezenta deklarasaun polítika ne’ebé ko’alia kona-ba setor edukasaun ne’ebé hamosu polémika liuliu profesór sira kontratu ne’ebé rezulta eskola balun taka no afeta ba prosesu aprendizajen inklui asuntu infraestrutura liuliu ponte no estrada hodi fasilita movimentasaun transporte.
Entretantu iha intervensaun diversa Deputadu sira nian, kontinua sujere ba Governu atu rezolve kontratu sira ba pesoál saúde, profesór sira hodi la bele difikulta prosesu atendimento iha klínika no hospital sira inklui prosesu aprendizajen iha eskola sira.
Vise-Ministru ba Asuntu Parlamentar, Adérito Hugo da Costa, informa katak Governu rezolve daudauk ona preokupasaun públiku liuliu ba pessoal saúde sira inklui profesór sira nian inklui kestaun infraestrutura.
Iha sesaun plenária ne’e mós anunsia ba Deputadu sira kona-ba Grupu Parlamentar Amizade ba VI Lejizlatura nian.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Ministru ba Asuntu Parlamentar, Adérito Hugo da Costa. FIM
