Pagina Inicial»Noticia
Komisaun C ne’ebe trata asuntu Finansas Públikas, iha Parlamentu Nasionál hala’o atividade fiskalizasaun ba Portu Tibar iha Munisipiu Liquiça, iha loron 25 fulan janeiru tinan 2024.
Atividade fiskalizasaun ne’e hahú ho reuniaun entre Deputadu sira Komisaun C nian ho autoridade Portu Tibar, hodi atualiza kona-ba servisu Portuariu nian durante ne’e.
Durante reuniaun, Autoridade Portuariu ne’ebe kompostu husi Diretora Portu Dili, Responsavel Empreza Bolloré, Alfandega ho nia ekipa sira hodi informa kona-ba dezafiu no progresu sira liuliu reseitas ne’ebe hetan liu husi Portu Tibar nian.
Ekipa Portu Tibar mós klarifika ba Deputadu sira kona-ba preokupasaun publiku nian kona-ba folin sasan iha merkadu ne’ebe kauza husi taxa iha Portu Tibar, ne’ebe tuir autoridade sira katak folin sasan hirak ne’e sae tuir importador sira nian desijaun enkuandu Portu Tibar kontinua jere tuir regra ho akordu ne’ebe estabelese ona.
Deputadu sira Komisaun C nian kontinua enkoraja ekipa sira atu servisu ho regra no kontinua buka maneira ne’ebe diak hodi hetan reseita ne’ebe diak liu ba Estadu Timor-Leste. FIM
