Pagina Inicial»Noticia
Vise-Prezidente Parlamentu Nasionál, Deputada Maria Terezinha da Silva Viegas, reprezenta Prezidente Parlamentu Nasionál, simu audiénsia husi Diretora Divizaun ba Adezaun Organizasaun Mundial Komersiu nian, Maika Oshikawa ho nia equipa ne’ebe mak akompaña husi Embaixadora Timor-Leste ba Zenebra, Maria Lourdes Bessá, iha Gabinete Vise Prezidente nian, iha loron 25 fulan janeiru tinan 2024.
Durante audiénsia ko’alia kona-ba prosesu preparasaun Parlamentu Nasionál nian ba eventu asina akordu Timor-Leste adere ba Organizasaun Mundial Komersiu ka WTO (World Trade Organisation) ne’ebe tuir planu sei realiza iha loron 26 fulan fevereiru tinan 2024.
Relasiona ho asuntu ne’e, ekipa mós koalia uitoan kona-ba adezaun Timor-Leste nian ba ASEAN.
Vise-Prezidente konsidera adezaun ba organizasaun rua ne’e importante tebes ba Timor-Leste, tanba ne’e Parlamentu Nasionál iha ona planu atu harii komisaun eventual ba adezaun organizasaun rua ne’e iha tempo badak.
Komisaun eventual refere sei akumula husi reprezentante Bankada Parlamentar sira ho proporsionalidade.
Tuir Vise-Prezidente, tempu ona atu Timor-Leste adere ba organizasaun rua ne’e, maski iha dezafiu barak ne’ebe Timor-Leste sei enfrenta, maibé fiar katak Timor-Leste sei hetan benefisiu barak ba dezenvolvimentu Estadu nian liu husi adezaun refere.
Durante reuniaun, Vise-Prezidente mós simu dokumentu kona-ba adezaun Timor-Leste ba WTO hanesan koñesimentu ida ba Parlamentu Nasional. FIM
