Pagina Inicial»Noticia
Parlamentu Nasionál liu husi sesaun plenária ordinária iha loron 23 fulan janeiru tinan 2024, halo votu pezar ba saudozu Amandio de Sá Benevides, atual Ministru Justisa iha IX Governu, ne’ebe hakotu-is iha loron 20 fulan janeiru tinan 2024, iha Hospital Nasionál Guido Valadares Díli.
Hafoin diskute no halo aditamentu ba biografia saudozu nian, liga ba servisu no partisipasaun saudozu nian iha luta libertasaun nasionál ho kontribuisaun ba prosesu dezenvolvimentu hafoin ukun rasik-an, Deputadu sira aprova votu pezar ne’e ho 60 votu a favor, 0 kontra no 0 abstensaun.
Iha período de antes orden do dia nian, Bankada FRETILIN hato’o deklarasaun politika kona-ba problema edukasaun liuliu profesor sira kontratadu hodi ejiji ba Governu buka solusaun imediata.
Entretantu iha intervensaun diversa, Deputadu sira aprezenta preokupasaun kona-ba akordu delimitasaun fronteira terrestre entre Timor-Leste ho Indonezia iha area Oecussi Naktuka nian, ne’ebe hamosu polemika iha komunidade, inklui asuntu importante sira seluk.
Reuniaun plenaria ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Ministru ba Asuntu Parlamentar, Aderito Hugo da Costa. FIM
