Pagina Inicial»Noticia
Parlamentu Nasionál liu husi sesaun plenária iha loron 13 fulan dezembru tinan 2023, aprova ona Orsamentu Jerál Estadu tinan 2024 iha Jeneralidade ho 43 votus a favor, 8 kontra no 1 abstensaun.
Antes hakat ba aprovasaun jeneralidade, iha debate loron ikus ba jeneralidade ne’e Deputadu sira no Governu konsentra ba polítika no programa liga ba proposta OJE ne’ebé Governu aprezenta hodi bele implementa iha tinan 2024.
Husi montante US$ Biliaun 1.95 ne’e, Governu garante nia ezekusaun hodi aselera dezenvolvimentu tuir planu ne’ebé Governu define ona ho kontrolu no fiskalizasaun ne’ebé efetivu husi Parlamentu Nasionál.
Ho aprovasaun iha jeneralidade ne’e, Parlamentu Nasionál sei kontinua halo diskusaun iha espesialidade ba proposta refere iha loron 14 fulan dezembru tinan 2023.
Reuniaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Primeiru-Ministru, Kay Rala Xanana Gusmão, ho nia membru governu sira. FIM
