Pagina Inicial»Noticia
Parlamentu Nasionál liu husi sesaun plenária ordinária iha loron 20 fulan novembro tinan 2023, aprova ona Proposta Alterasaun Lei númeru 2/VI (1å), terseiru alterasaun lei númeru 3/2014 de 18 junho, ne’ebé kria Rejiaun Administrativa Espesiál Oe-Cusse Ambeno no estabelese Zona Espesiál Ekonomia Sosiál Merkadu Oe-Cusse Ambeno no Ataúru, inklui proposta lei númeru 3/VI (1å), Kuarta Aliterasaun lei 11/2009 de 7 Outubru, ne’ebé aprova Divizaun Administrativa Territóriu, iha final global, ho 41 votu a favor, 0 kontra no 4 abstensaun.
Antes halo aprovasaun ba lei refere, iha parte dadeer, Deputadu sira halo uluk apresiasaun ba relatóriu fiskalizasaun hosi komisaun A ne’ebe trata asuntu Konstitusial ho Justisa iha munisipiu Manufahi, RAEOA, Bobonaro no Dili, no kontinua kedas ba deklarasaun politika husi Bankada FRETILIN ne’ebé ko’alia kona-ba prosesu justisa iha Timor-Leste liga ba kompetensia sira orgaun soberania tuir Konstituisaun haruka.
Entretanto iha intervensaun diversas, Deputadu sira hato’o ba Governo atu halo investimentu no assegura labarik sira bele asesu ba saúde, alimentasaun no edukasaun ho kualidade no igualdade no asuntu importante sira seluk.
Reuniun Plenária ne’e , prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Ministru Prezidensia Konsellu Ministru, Agio Pereira, Ministru Administrasaun Estatal, Tomas do Rosario Cabral no Vise Ministru Asuntu Parlamentar , Aderito Hugo da Costa. FIM
