Pagina Inicial»Noticia
Parlamentu Nasionál iha sesaun plenária ordinária iha loron 31 fulan outubro tinan 2023, aprova Projetu Rezolusaun númeru 17/VI(1ª) – Aprova Orsamentu Parlamentu Nasionál ba tinan 2024, ho 53 votu a favor, 0 kontra no 0 abstensaun.
Diskusaun no aprovasaun Orsamentu Parlamentu Nasionál nia ba tinan 2024 ne’e inisia ho aprezentasaun relatóriu no parecer husi Komisaun C.
Orsamentu Parlamentu Nasionál ba tinan 2024 ho montante $17.780.054,00 dolar amerikanu ne’ebé fahe ba kategoria; Saláriu no Vensimentu $ 13.186.897,00 dolar amerikanu; Bens no Servisu $2.650.996,00 dolar amerikanu; Kapitál Menor $ 1.276.811,00 dolar amerikanu no Transferénsia $ 665.350,00 dolar amerikanu.
Proposta orsamentu ne’e kontempla 23 unidade orsamentál ne’ebé elabora tuir planu asaun anual ne’ebé identifika.
Iha período de antes da ordem do dia nian, Bankada Parlamentar FRETILIN aprezenta deklarasaun polítika ne’ebé ko’alia kona-ba prosesu eleisaun lideransa suku no aldeia ne’ebé hamosu preokupasaun barak iha eleitor ka komunidade sira.
Entretantu iha intervensaun diversa nian Deputadu sira aprezenta preokupasaun kona-ba seguransa durante loron boot finado no husu parte seguransa atu asegura área hirak ne’ebé sempre hamosu konflitu inklui preokupasaun sira seluk.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Ministru Asuntu Parlamentar, Adérito Hugo da Costa, Sekretáriu-Jerál Adjunto Parlamentu Nasionál, João Rui Amaral ho nia ekipa sira. FIM
