Pagina Inicial»Noticia
Parlamentu Nasionál liu husi Grupu Nasionál Uniaun Inter Parlamentar Timor-Leste (UIP-TL) ne'ebe lidera husi Prezidente UIP-TL Deputada Veneranda Lemos, akompaña husi membru sira no Sekretáriu Jerál Parlamentu Nasionál, partisipa iha reuniaun Uniaun Inter Parlamentar ba dala 147, ne'ebe realiza iha Luanda Angola, iha loron 23 too 27 fulan outubro tinan 2023.
Iha reuniaun ba loron dahuluk ne'e Grupu Nasionál UIP partisipa iha reuniaun Asia Pasific Group (APG), ne'ebe ko'alia kona-ba kandidatura foun ba Prezidente Asia Pasific Group no membru ezekutivu Asia Pasific Group (APG). Timor-Leste nia pozisaun hakarak fó apoiu ba nasaun viziñu rua ne’ebé mak sei kandidata aan hanesan Austrália ho Indonézia.
Iha reuniaun ne'e ko'alia mós kona-ba kandidatura ba Prezidente Uniaun Inter Parlamentar UIP foun mak feto na'in haat ne'ebe mai husi nasaun ketak ketak hanesan Tanzánia, Somália, Malawi ho Senegal ba tinan 2023-2026.
Iha sorin seluk, Prezidente UIP-TL Deputada Veneranda Lemos akompaña husi Sekretáriu Jerál, partisipa iha reuniaun bilateral AP-CPLP, hodi ko'alia kona-ba proposta ne’ebé mak Timor-Leste rekomenda ba Organizasaun Uniaun Inter Parlamentar UIP, hodi konsidera Língua Português, hanesan língua traballu Uniaun Inter Parlamentar.
Entretantu Deputada Carminda Carlota, Partisipa iha reuniaun Grupu Feto Parlamentar, no iha parte loraik Prezidente UIP Timor Leste kontinua partisipa reuniaun Asian Parliamentary Assembly (APA). FIM
