Pagina Inicial»Noticia
Parlamentu Nasionál liu husi sesaun plenária ordinária iha loron 26 fulan setembru tinan 2023, aprova ona nia Planu Estratéjiku ba tinan 2023-2027, ho 62 votu a favor, 0 kontra no 0 abstensaun.
Planu Estratéjiku ne’e rasik antes ne’e hetan ona apresiasaun husi Konsellu Administrasaun, ne’ebé identifika prioridade sira Parlamentu Nasionál nian iha tinan haat mai.
Iha sesaun plenária ne’e mós autoriza dezlokasaun Prezidente Repúblika hodi halo viajen Estadu ba Roma no EUA iha fulan outubro mai.
Entretantu iha período de antes da ordem do dia nian, Bankada KHUNTO aprezenta nia deklarasaun polítika ne’ebé ko’alia kona-ba disputa rai iha parte Audian.
Iha intervensaun diversa nian, Deputadu sira aprezenta preokupasaun sira kona-ba estrada ligasaun munisípiu ba postu administrativu sira, negosiante xineza ne’ebé domina iha territóriu nasionál, intervensaun polítika iha administrasaun publika no asuntu importante sira seluk.
Vise-Ministru Asuntu Parlamentar, Adérito Hugo da Costa, informa asuntu hirak ne’ebé aprezenta husi Deputadu sira sei envia ba ministériu kompetente hodi responde no rezolve.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Ministru Asuntu Parlamentar, Adérito Hugo da Costa. FIM
