Pagina Inicial»Noticia
Sentru Formasaun promove formasaun ida durante loron tolu destina ba pesoál sira apoiu gabinete Membru Meza Parlamentu Nasionál, Sekretáriu-Jerál no pesoál Bankada Parlamentar sira. Objetivu fundamental husi formasaun ida-ne’e atu kapasita funsionáriu sira kona-ba kompeténsia Parlamentu Nasionál, funsionamentu órgaun sira iha Parlamentu, prosedimentu korrespondénsia sira iha Parlamentu Nasionál no atendimentu públiku. Formasaun ne’e hahú iha loron 12 too 14 fulan setembru, iha Sala de Formação João Paulo II, Comoro, Díli.
Durante diskursu ba abertura, Sekretáriu-Jerál Parlamentu Nasionál, agradese uluk Sentru Formasaun nia esforsu hodi konkretiza asaun formasaun ne’e no kontinua organiza atividade sira ba kapasitasaun laos de’it ba kuadru pesoál maibé mós ba la’ós kuadru pesoál. Tuir mai Sekretáriu-Jerál enkoraja formadu sira atu aproveita matéria sira ho koñesimentu sira durante loron tolu husi formador sira no aplika iha servisu loroloron. Sekretáriu-Jerál aumenta katak formasaun ida-ne’e la’ós tanba formadu sira la iha koñesimentu maibé harmoniza no hakle’an tan koñesimentu kona-ba servisu parlamentar. Kada formadu sira iha koñesimentu no esperiénsia ne’ebé diferente tanba ne’e ho formasaun ida-ne’e harmoniza fila fali koñesimentu iha kontestu servisu parlamentar.
Abertura ba asaun formasaun ne’e hetan prezensa husi Sekretáriu-Jerál Parlamentu Nasionál, Edgar Sequeira Martins, Diretór Rekursu Umanu, Hélio Leite Magalhães, no Xefe Sentru Formasaun, Lino Soares de Carvalho. FIM
