Pagina Inicial»Noticia
Parlamentu Nasionál iha loron 31 fulan agosto tinan 2023, hahú ona loron dahuluk ba semináriu kona-ba Parlamento Nacional, Democracia e Relações Internacionais, ba Deputadu sira VI Lejizlatura ne’ebé hala’o iha sala plenária.
Semináriu loron dahuluk ne’e hahú ho abertura husi Prezidente Parlamentu Nasionál interina, Maria Terezinha Viegas, ne’ebé ko’alia kona-ba importánsia husi semináriu refere ho matéria sira ne’ebé aprezenta husi orador sira.
Orador sira ba semináriu loron dahuluk mak hanesan; Xefe Komisaun ba Kooperasaun Parlamentar DPR-RI, Dr. Fadli Zon, aprezenta matéria kona-ba papel parlamentu iha AIPA; Vise-Ministra Negósiu Estranjeiru ba Asuntu ASEAN, Milena Maria da Costa Rangel, aprezenta matéria kona-ba Adezaun Timor-Leste ba ASEAN no Organizasaun Mundial ba Komérsiu; reprezentante UN Women iha Timor-Leste, Uvalda Alves, aprezenta matéria kona-ba polítika igualdade jéneru no perspetiva jéneru iha lejizlasaun timor nian; Cesário da Silva, Prezidente Asosiasaun Defisiénsia Timor-Leste, aprezenta matéria kona-ba parseria sosiedade sivíl ho Parlamentu Nasionál; Brígida Soares, espesialista ODS, aprezenta matéria kona-ba objetivu dezenvolvimentu sustentável no Deputada Parlamento Austrália Janelle Saffin, ne’ebé aprezenta matéria kona-ba Uniaun Interparlamentar ho nia dezafiu ba promosaun ba paz iha sosiedade inkluziva no dezenvolvimentu sustentável.
Durante aprezentasaun ne’e, iha mós sesaun husu no hatán husi Deputadu sira ne’ebé hetan kedas resposta husi orador sira.
Semináriu ba loron daruak sei hala’o iha loron 4 fulan setembru tinan 2023, ho orador nasionál sira ho diferente matéria. FIM
